काठमाडौंकी ३५ वर्षिय रुबिना शर्मा (नाम परिवर्तन)लाई मानवतस्करीमा संलग्न गिरोहले १८ हजार दिराम अर्थात् करिब पाँच लाख रुपैयाँमा बिक्री गरेको प्रहरीले जनाएको छ । चार दिनअघि उनको उद्धारसँगै प्रहरीले एक एजेन्टलाई पनि पक्राउ गरेको छ । उनलाई नक्कली कागजपत्र बनाई त्रिभुवन अन्तर्राष्ट्रिय विमानस्थलबाटै ओमान पुर्याइएको हो ।
प्रहरीका अनुसार रुबिनाले घरेलु कामदारका रूपमा करिब ५ महिना काम गरेकी थिइन् । दुई महिनाको मात्र तलब पाएको र घरमा पशुसरह व्यवहार भएको थाहा पाएपछि उनको परिवारले प्रहरीमा उजुरी दिएको थियो । प्रहरीले एजेन्टलाई पक्राउ गरी उनको उद्धार गरेको हो । मानवतस्कर समूहले दुबईको एक कम्पनीको नक्कली पत्र बनाएर उनलाई त्रिभुवन विमानस्थलबाटै दुबई पुर्याएको थियो । नक्कली कागजपत्रकै आधारमा उनी दुबई जानुमा अध्यागमनका कर्मचारीको समेत मिलेमतो रहेको प्रहरीको आशंका छ ।
प्रहरी अनुसन्धानका क्रममा दुबईमा रहेका एजेन्टले कुवेतका व्यक्तिलाई १८ हजार दिराममा बिक्री गरेको खुलेको हो । उनीजस्तै घरेलु कामदारका लागि धेरै नेपाली महिलाको खरिदबिक्री र यौनशोषणसमेत हुने गरेको महानगरीय अपराध महाशाखाका डिएसपी होबिन्द्र बोगटीले बताए । घरेलु कामदारका लागि भनेर सुरुमै मोलमोलाइ गरेर दुबईमा रहेका एजेन्टले बिक्री गर्दै आएको प्रहरीले जनाएको छ ।
दुबईबाट इराक, सिरियाजस्ता द्वन्द्वग्रस्त देशमा समेत युवतीहरू बेचिने गरेको प्रहरी अधिकारी बताउँछन् । दलालले आकर्षक जागिरको प्रलोभनमा पारी नेपाली चेलीलाई ती देशमा पुर्याएर बिक्री गर्दै आएको अनुसन्धानमा आबद्ध प्रहरी अधिकारीको भनाइ छ । कुवेत, ओमान, सिरियालगायत देशमा अवैध रूपमा पुगेका सयौँ नेपाली युवतीलाई ‘दासी’का रूपमा घरेलु काममा लगाइने गरिएको छ ।
भिजिट भिसामा दुबई पुर्याएर महिलाको बिक्री हुने भएकाले नै अन्तर्राष्ट्रिय विमानस्थलबाट भिजिट भिसामा जान कडाइ गरिएको छ । सोही कारण भारतको बाटो भएर दलालले नेपाली युवतीलाई खाडी मुलुक हुँदै विभिन्न देशमा पु¥याउने गरेका छन् ।
कोलम्बोबाट १९ युवती फर्काइए
श्रीलंकाको कोलम्बो विमानस्थलबाट दुबई भन्दै कुवेत पठाउन लागिएका १९ युवतीको प्रहरीले उद्धार गरेको छ । नेपाल प्रहरीले २०, २१ र २२ असोजमा श्रीलंकाको अध्यागमन अधिकारीहरूसँग सहकार्य गरी उनीहरूलाई फर्काएको हो । विभिन्न जिल्लाका युवतीलाई एजेन्टले भारतबाट कोलम्बो हुँदै दुबई भएर ओमान लैजान लागेका थिए । यसअघि भारतबाट सीधै दुबई लैजाने गरिएकोमा नेपालको आग्रहपछि भारतले दुबई जाने नेपाली युवतीमाथि कडाइ गर्न थालेपछि उनीहरूले कोलम्बो रुट रोजेका हुन् ।प्रहरीले श्रीलंकाको अध्यागमनसँग सहकार्य गरी पछिल्लो समय त्यहाँबाट कोलम्बो जान खोज्नेलाई रोक्दै आएको छ । उद्धार गरिएका युवतीलाई माइती नेपालको जिम्मा लगाइएको र मानवतस्करीमा संलग्नको खोजी भइरहेको महानगरीय अपराध महाशाखाका डिएसपी होबिन्द्र बोगटीले बताए । युवतीलाई विदेश लैजाँदा एजेन्टले धेरै पैसा पाउने भएकाले युवतीसँग दलालले पैसा लिने गरेका छैनन् ।आजको नयाँ पत्रिकामा खबर छ ।
0 comments:
Post a Comment